Fís Athnuaite

Mar Chathaoirleach ar Bhord Fhís Éireann,

tá lúcháir orm fáilte a chur roimh fhoilsiú Fís Athnuaite, plean straitéiseach cúig bliana nua na gníomhaireachta.

Tá mé i mo bhall de bhord Fhís Éireann ó 2021 i leith, agus le linn an ama sin bhí sé de phribhléid agam fuinneamh agus tiomáint iontach cruthaitheach ár dtionscail a fheiceáil ó pheirspictíocht nua. D’ainneoin na n-athruithe agus na mbristeacha le blianta beaga anuas, tá an fhiontraíocht, an chruthaitheacht, an uilechuimsitheacht agus an nuálaíocht léirithe ag an earnáil.  Mar chumadóir scannáin, táim an-bhródúil as a bheith mar chuid de thionscal scáileáin na hÉireann agus as an rath a bhí air agus táim buíoch as an tslí bheatha a thug sé dom.

Tá tacar sainscileanna uathúil agus éagsúil ag Bord reatha Fhís Éireann, ceann a thaispeánann an réimse leathan scileanna agus ról ar fud an tionscail. Táim bródúil as obair leanúnach an Bhoird seo ag soláthar maoirseachta agus rialachais d’Fhís Éireann agus a chuid tacaíochtaí don tionscal. Le chéile, tá fís agus uaillmhian láidir ag an mBord agus ag an bhfoireann ag Fís Éireann maidir le fás earnáil scáileáin na hÉireann.

Tá tionscal na scannán ar fud an domhain ag dul trí athrú mór, agus le déanaí tá dúshláin tagtha chun cinn amhail laghdú ar an tionscal, gníomhaíocht stailce agus laghdú díoloifige domhanda ó tharla an phaindéim. Sa timpeallacht neamhchinnte seo, tá sé ríthábhachtach gníomhaireacht náisiúnta láidir a bheith ann cosúil le Fís Éireann a bheidh in ann tacaíocht straitéiseach agus idirghabhálacha a sholáthar a oibríonn dár n-earnáil.

Leagtar amach i bhFís Athnuaite sé chuspóir straitéiseacha mar réimsí tosaíochta do na céad chúig bliana eile den ghníomhaireacht, ach tá téamaí lárnacha, bunúsacha fite fuaite tríd, atá ríthábhachtach do gach cuspóir agus ar fud an tionscail.

Áirítear orthu siúd inbhuanaitheacht chomhshaoil; éagsúlacht agus cuimsiú; an Ghaeilge; agus cur chuige náisiúnta maidir le forbairt agus fás an tionscail. Tá Bord Fhís Éireann tiomanta d’éisteacht leis na léiritheoirí, na healaíontóirí agus na heagraíochtaí atá sa tionscal againn, agus na chéad chéimeanna eile a ghlacadh le chéile. Mar aon le foireann agus Feidhmeannas Fhís Éireann, táimid ag tnúth leis an bplean straitéiseach seo a chur i bhfeidhm i gcomhpháirtíocht le tionscal scáileáin na hÉireann sna cúig bliana amach romhainn.

- Ray Harman, Chathaoirleach ar Bhord Fhís Éireann

Mar Phríomhfheidhmeannach ar Fhís Éireann, tá lúcháir orm Fís Athnuaite a thabhairt isteach, plean straitéiseach cúig bliana nua na gníomhaireachta.

Ag croílár mhisean Fhís Éireann tá cultúr na hÉireann a chur in iúl ar an scáileán agus tacaíocht a thabhairt do scannánaíocht na hÉireann mar fhoirm ealaíne.  Léiríonn an straitéis seo fís athnuaite dár sainchúram cultúrtha amach anseo, ag infheistiú in uaillmhian ealaíne ar an scáileán agus ag soláthar spáis do scéalaithe na hÉireann chun an saothar is fearr agus is féidir a chruthú.

Le linn fhráma ama an phlean straitéisigh roimhe dar teideal ‘Ag Tógáil Ar Son Todhchaí Cruthaitheach 2024’, cuireadh isteach go mór ar thionscal scáileáin na hÉireann ach bhain sé ardmholadh tráchtála agus criticiúil gan fasach amach ar fud an domhain.  Ba shuntasach na blianta seo freisin le teacht chun cinn go leor guthanna nua agus tallann chruthaitheach – taobh le ré nua don scannánaíocht Ghaeilge.

Le tacaíocht láidir agus mharthanach ón Roinn Turasóireachta, Cultúir, Ealaíon, Gaeltachta, Spóirt agus Meán, tá leathnú tagtha ar shainchúram Fhís Éireann agus tá fás suntasach tagtha ar an ngníomhaireacht leis an leibhéal maoinithe is airde riamh. Tá infheistíocht straitéiseach déanta thar phríomhréimsí tosaíochta lena n-áirítear; líonra na nAcadamh Náisiúnta Tallainne le haghaidh forbairt scileanna, infheistíocht i nuálaíocht formáidí nua agus teicneolaíochtaí scéalaíochta, tairseacha méadaithe maoinithe le haghaidh forbartha agus léirithe

Ag Fís Éireann creidimid go bhfuil forbairt tallainne ag croílár tionscail scáileáin faoi bhláth.

I gcaitheamh na gcúig bliana amach romhainn tacóidh Fís Éireann leis an gcéad ghlúin eile de dhéantóirí scannán agus de ghairmithe cruthaitheacha – léiritheoirí, stiúrthóirí, scríbhneoirí scripte scannáin, beochantóirí, ealaíontóirí maisíochta físe, forbróirí cluichí agus criú léirithe a úsáideann a gcuid tallainne, scileanna agus a bhfís chruthaitheach chun gur féidir tionscadail a chur i gcrích. Leagann Fís Athnuaite béim freisin ar an tábhacht a bhaineann le forbairt náisiúnta, ag tacú le deiseanna ar fud na tíre agus ag tógáil bonneagair a chuideoidh le huaillmhian chomhchoiteann na hearnála a bhaint amach.

Léirigh páirtithe leasmhara scannánaíochta agus eagraíochtaí pobail ar fud na tíre paisean, dúthracht agus fís don earnáil. I gcomhpháirtíocht, tógfaimid le chéile todhchaí níos uaillmhianaí fós don tionscal scáileáin cruthaitheach.  Todhchaí chruthaitheach ina mbeidh Éire ina fórsa cultúrtha agus domhanda, suite mar cheann de na timpeallachtaí léiriúcháin scáileáin is fearr ar domhan.

- Désirée Finnegan, Príomhfheidhmeannach, Fís Éireann

Fáilte go dtí plean straitéiseach Fhís Éireann, Fís Athnuaite 2025 – 2029, ar breac-chuntas é ar na príomhthosaíochtaí agus na príomhréimsí fócais do na cúig bliana amach romhainn. Forbraíodh Fís Athnuaite tar éis ‘Ag Tógáil Ar Son Todhchaí Cruthaitheach 2024’ a sheachadadh, plean straitéiseach na gníomhaireachta roimhe seo. Is léiriú é ar thréimhse iontach chlaochlúcháin agus ratha do thionscal scáileáin na hÉireann, áit a bhfuil moladh idirnáisiúnta agus rath déanta staire taobh le bristeacha agus dúshláin nach bhfacthas riamh roimhe. Cé go bhfuil sé mar aidhm ag Fís Éireann leanúint le hobair rathúil na tréimhse seo, tá sé ríthábhachtach an fhís seo a leathnú agus a bheachtú.

I gcás Fís Athnuaite, is príomhfhorbairt é aistriú i gcur chuige straitéiseach Fhís Éireann: fócas níos láidre ar an mbonneagar riachtanach a thógáil chun ár n-earnáil a chumhachtú, agus freagracht chomhchoiteann a cheadaíonn aghaidh a thabhairt ar dhúshláin agus deiseanna de réir mar a thagann siad chun cinn. Tá sé ríthábhachtach go dtabharfaidh an chéad chéim eile de thionscal scáileáin na hÉireann páirtithe leasmhara scáileáin agus ealaíontóirí le chéile mar chomhpháirtithe comhionanna amach anseo.

Is é atá ann fós ná croílár mhisean Fhís Éireann: léiriú an chultúir náisiúnta ar an scáileán. I margadh atá ag athrú go tapa agus ag éirí níos iomaíche, tá maoiniú poiblí do scannán agus teilifís na hÉireann níos riachtanaí anois ná riamh. Tacaíonn Fís Éireann le tionscadail de gach méid, do lucht féachana áitiúil agus idirnáisiúnta araon, agus i gcaitheamh na mblianta, tá maoiniú curtha ar fáil ag an ngníomhaireacht do go leor tionscadal arbh fhéidir nach ndéanfaí ar chor ar bith iad murach sin. Is é an phribhléid atá againn ná an cumas tacaíocht a thabhairt do scéalta iontacha ar féidir leo dul i gcion agus nasc a dhéanamh lasmuigh d'fhórsaí an mhargaidh. Is é sin an bonn d’fhís athnuaite dár sainchúram cultúrtha amach anseo, chun tacú le riosca cruthaitheach agus fís ealaíonta, agus spás a chur ar fáil do scéalaithe na hÉireann chun an obair is fearr is féidir a dhéanamh.

Aiseolas ó Pháirtithe Leasmhara

Tá Fís Athnuaite curtha le chéile trí chomhairliúchán fairsing le páirtithe leasmhara inmheánacha agus seachtracha ar fud thionscal scáileáin na hÉireann.

I dtaighde a rinne Alma Economics, fostaíodh 66 pháirtí leasmhara san iomlán trí agallaimh ar líne, lena n-áirítear ionadaithe ó chuideachtaí atá ag feidhmiú san earnáil chlosamhairc, comhlachtaí trádála tionscail, cuallachtaí san earnáil chlosamhairc, saineolaithe earnála, eagraíochtaí scileanna, féilte scannán, stiúideonna, dáileoirí, craoltóirí, ranna rialtais agus rialtóirí.

Reáchtáladh ceardlanna agus fócasghrúpaí i nGaillimh agus i mBaile Átha Cliath, le 40 rannpháirtí seachtrach agus thart ar 30 ball ó Fhís Éireann. Dearadh agus dáileadh dhá shuirbhé chuimsitheacha, ag bailiú 269 bhfreagra ó chuideachtaí ar fud na hearnála closamhairc, agus 290 freagra ó ghairmithe atá ag obair sa tionscal.

D'fhill an t-aiseolas seo ar phríomhréimsí agus ar phríomhthéamaí lena n-áirítear: fócas leanúnach ar an earnáil intíre; an tábhacht a bhaineann le coinneáil IP (maoin intleachtúil); tacaíocht mhéadaithe do léiriú Gaeilge; an gá atá le próisis mhaoinithe níos gasta agus níos freagrúla; agus forbairt na dteicneolaíochtaí atá ag teacht chun cinn. Léirítear iad sin ar fud an phlean agus mar thoradh orthu ceapadh sé chuspóir straitéiseacha ar leith a mbeidh Fís Éireann tiomanta dá gcomhlíonadh i gcaitheamh na tréimhse cúig bliana atá le teacht.

Ár bhFís a Athnuachan

Is fís athnuaite é Fís Athnuaite don chéad chéim eile de thionscal scáileáin na hÉireann, ag tógáil ar an obair atá ann cheana féin agus ag baint úsáid as ábhair ratha le déanaí mar threoir.

Príomhthéama ar fud Fís Athnuaite is ea go bhfuil daoine i gcroílár gach ratha agus gach scéil. Nuair a dhéanaimid tagairt do thallann chruthaitheach nó do lucht déanta scéalta, is éard atá i gceist againn ná gach ball de léiriú a oibríonn go sciliúil agus go healaíonta chun scéal a léiriú ar an scáileán. Mar thoradh air sin, cruthaíodh cuspóir nua atá dírithe ar Fhorbairt Tallainne sa phlean straitéiseach seo, a leagann béim ar ról lárnach na n-ealaíontóirí inár bhfís do thodhchaí thionscal scáileáin na hÉireann.

Tá scála agus uaillmhian a mhéadú lárnach do thodhchaí thionscal an scáileáin, trasna bonneagair agus scéalaíochta. Tar éis méadú suntasach ar infheistíocht le blianta beaga anuas, tá claochlú dochreidte tagtha ar scannánaíocht Ghaeilge, rud a d’fhág go bhfuil pleananna ag Fís Éireann maoiniú a imfhálú do scéalaíocht Ghaeilge, ó ghearrscannáin go drámaí teilifíse agus scannánaíocht. I measc na réimsí eile le haghaidh iniúchta agus leathnaithe tá neartú an bhonneagair chultúrtha ar fud an tionscail scáileáin ar bhonn náisiúnta; forbairt agus coinneáil IP a chur chun cinn; agus inbhuanaitheacht i gcroílár gach gníomhaíochta, ó thaobh uaillmhéine agus freagrachta de araon.

Cuspóirí Straitéiseacha

Tá Plean Straitéiseach Fhís Éireann múnlaithe ag an ról atá againn mar an ghníomhaireacht náisiúnta maidir le cumhacht a thabhairt don earnáil scáileáin chruthaitheach in Éirinn agus tacú léi.

Is iad na cuspóirí straitéiseacha atá againn ná gealltanais d’Fhís Éireann chun:

1. TACÚ le CULTÚR na hÉireann agus SCÉALAÍOCHT chruthaitheach uaillmhianach ar an scáileán.

2. INFHEISTÍOCHT i bhFORBAIRT TALLAINNE DO LUCHT DÉANTA SCÉALTA agus EALAÍONTÓIRÍ na hÉireann.

3. Tacú le TIONSCAL INBHUANAITHE i gCOMHPHÁIRTÍOCHT le páirtithe leasmhara AR FUD NA TÍRE.

4. TACÚ le tionscal agus é a CHUMASÚ chun SCILEANNA a fhorbairt agus GLÚIN NUA éagsúil de chruthaitheoirí a mhúnlú ar fud na tíre.

5. Bonneagar cultúrtha a THÓGÁIL do LUCHT FÉACHANA le SPÉIS A FHÁIL agus CAIDREAMH A DHÉANAMH le scéalta scáileáin na hÉireann.

6. A chinntiú go bhfuil na hacmhainní cuí ag FÍS ÉIREANN, go bhfuil sé lúfar agus INBHUANAITHE chun SEACHADADH go héifeachtach don tionscal.

Nuashonrú Ar Dhul Chun Cinn

In 2021, sheol Fís Éireann a phlean straitéiseach trí bliana, Ag Tógáil Ar Son Todhchaí Chruthaitheach 2024, ina raibh cúig chuspóir straitéiseacha le cur in ord tosaíochta ag an ngníomhaireacht. Le haghaidh athbhreithniú iomlán ar dhul chun cinn ar an gcaoi ar chomhlíon Fís Éireann na cuspóirí agus na príomhghníomhaíochtaí atá leagtha amach sa phlean seo ó 2021 go 2024, cliceáil anseo.

Foilseoidh Fís Éireann léirmheas domhain ar dhul chun cinn go luath, ina dtabharfar sonraí iomlána ar an gcaoi ar chomhlíon Fís Éireann na cuspóirí agus na príomhghníomhaíochtaí atá leagtha amach sa phlean seo ó 2021 go 2024.

Do na Scéalaithe

Mar ghníomhaireacht náisiúnta do thionscail teilifíse, bheochana, faisnéise, maisíochta físe agus cluichí digiteacha na hÉireann, is é Fís Éireann páirtí cruthaitheach na hearnála, a infheistíonn i dtallann, sa chruthaitheacht, sa nuálaíocht agus i bhfiontar. Faighimid spreagadh ón scéalaíocht bhunaidh a chorróidh an lucht féachana go mothúchánach sa bhaile agus i bhfad i gcéin.

Trí réimse leathan de thacaíochtaí praiticiúla maoinithe a bhaineann le forbairt, léiriúchán, dáileadh, margaíocht agus forbairt scileanna, tacaíonn Fís Éireann leis an earnáil ag gach céim. Cuirimid bunús ar fáil do scannánóirí agus iad ag tabhairt faoi scéalta ealaíonta, cultúrtha agus tráchtála a roinnt go cruthaitheach ar scáileán.

Oibríonn Fís Éireann le healaíontóirí ag gach leibhéal agus ag gach céim, ó thús gairme go rath tráchtála, agus éachtaí ar stáitse an domhain. Tacaímid leis an lucht déanta scéalta: iad siúd go léir a dtugtar a scileanna cruthaitheacha, a gcuid tallainne agus saineolais le chéile chun tionscadail ardchaighdeáin scannáin, teilifíse, bheochana, faisnéise agus cluichí digiteacha a chruthú a thugtar ansin chuig lucht féachana in Éirinn agus go hidirnáisiúnta.

Tá Fís Éireann tiomanta d’fhorbairt agus d’fhás an tionscail ar fud na tíre, ag tacú le cur chuige déach a chothromaíonn léiriú Éireannach agus tionscadail idirnáisiúnta. Is é ár n-uaillmhian don earnáil gur féidir léiriú áitiúil agus idirnáisiúnta a dhéanamh ar fud na hÉireann, agus na buntáistí cultúrtha agus eacnamaíocha á gcur ar fáil don tír ar fad.

Misean agus Fís

Tá misean Fhís Éireann bunaithe ar an Acht um Bord Scannán na hÉireann, 1980. San Acht sin, is é misean na gníomhaireachta ná:

• Cabhrú agus spreagadh le déanamh scannán agus le forbairt tionscail scannáin sa Stát
• Léiriú an chultúir náisiúnta a spreagadh trí mheán na scannánaíochta
• Rannpháirtíocht i dtionscadail chomhoibríocha idirnáisiúnta a chur chun cinn

Is é an fhís atá ag Fís Éireann ná:

• Tacú le scannánóirí agus ealaíontóirí scáileáin Éireannacha dul i mbaol cruthaitheach agus an obair is fearr is féidir a dhéanamh.

Luachanna

Tugann Bord, Feidhmeannas agus foireann Fhís Éireann tosaíocht dár luachanna mar eagraíocht agus déanfaidh siad gach iarracht dul i mbun oibre a sheasann leis na luachanna seo maidir le bheith cruthaitheach, uaillmhianach, cuimsitheach, dóchasach, inbhuanaithe agus eiticiúil.

• Cruthaitheach: Tacaíonn Fís Éireann le hionracas cruthaitheach agus ealaíne in earnáil scáileáin na hÉireann agus laistigh den eagraíocht
• Inbhuanaithe: Tá Fís Éireann tiomanta d’inbhuanaitheacht ina dtéarmaí is leithne ar fud an tionscail scáileáin chruthaithigh agus laistigh den eagraíocht
• Dóchasach: Tá Fís Éireann ag féachaint chun cinn le dóchas, ag obair chun tacú le todhchaí gheal don earnáil scáileáin agus ag cothú caidrimh dhearfacha lena pháirtithe leasmhara
• Cuimsitheach: Is eagraíocht chuimsitheach í Fís Éireann, atá faoi thiomáint ag daoine, a oibríonn chun éagsúlacht, cothromas agus cuimsiú a chur chun cinn san earnáil scáileáin
• Uaillmhianach: Oibríonn Fís Éireann chun an earnáil scáileáin chruthaitheach a fhás go huaillmhianach in Éirinn agus glacann sé an príomhról maidir le tiomáint chun ratha
• Cothrom: Seasann Fís Éireann leis na caighdeáin eitice is airde ina ról mar ghníomhaireacht phoiblí – agus tiomantas do bheith cothrom le gach duine, mar mhaoinitheoir, mar thacadóir don tionscal scáileáin cruthaitheach, agus mar fhostóir

In 2024, tháinig moilliú ar thionscal na scannán agus na teilifíse domhanda, rud a chuaigh i bhfeidhm ar gach réimse den ghnó. Thit leibhéil léiriúcháin de ghnéchláir agus scannáin lánfhada SAM in 2023 de bhreis is 35%: 510 scannán in 2023 i gcomparáid le 810 in 2022. Bhí tionchar iarmhartach aige sin le haghaidh taispeántais in 2024 le ganntanas léiriúcháin agus líon laghdaithe scannán d’oibreoirí pictiúrlainne lena dtaispeáint.

Tháinig an borradh domhanda iar-phaindéimeach i léiriú scannán agus teilifíse chun críche. De réir taighde ó Bectu a nochtadh go déanach i mí Iúil 2024, tá leath d’oibrithe an tionscail scáileáin sa RA fós gan obair, taighde ó cheardchumann meán agus siamsaíochta na RA. Chuir an ceardchumann síos freisin ar staid éigeandála sa tionscal teilifíse mar gur tháinig an laghdú ba mhó riamh ar an lucht féachana craolacháin teilifíse san earnáil sin in 2023.

Treochtaí Lucht Féachana

Leanadh ar aghaidh leis an aistriú ó bheith ag breathnú ar theilifís líneach go SVOD, rud a fhágann go bhfuil mionú breise ar an lucht féachana agus daoine ag féachaint ar ábhar ag amanna a oireann dóibh. Cé go bhfuil tuairimí ann go mb’fhéidir go mbainfeadh scannáin leas as sin, léirigh taighde le déanaí sa Danmhairg go bhfuil éileamh ar leith ag lucht féachana níos óige, go háirithe, ar an eispéireas comhchoiteann a bhaineann le seánraí ar nós scannáin uafáis agus ghrinn a fheiceáil ar an scáileán mór.

Tar éis blianta fáis, thosaigh na huaireanta féachana do sheirbhísí sruthaithe ag leibhéaladh, cé gur tháinig méadú leanúnach ar líon na síntiúsóirí le Netflix a bhí ag 282.72 milliún duine ar fud an domhain faoi dheireadh 2024.

Sa tSín, a bhí chun tosaigh ar Mheiriceá Thuaidh mar an margadh scannán is mó ar domhan ó thaobh ioncaim de ar feadh píosa gearr, meastar gur thit an díoloifig amharclainne in 2024 thart ar $1.7 billiún de réir an mheáin trí bliana. Tháinig laghdú ar líon na ndaoine a chuaigh chuig an bpictiúrlann san India, cé go raibh an titim ceilte de bharr ardú ar phraghsanna ticéad. Bhí iontrálacha pictiúrlainne i margaí móra Mheiriceá Laidinigh fós níos ísle ná mar a bhí siad in 2019, agus díoladh níos lú ticéad i gcomhair roinnt scannáin mhóra dhomhanda ná mar a bhíothas ag súil leis. 

Téarnamh na Díoloifige

Mar sin féin, tá an earnáil ag téarnamh. In ainneoin na tuairteála a tharla sa chéad leath de 2024, tháinig an dóchas ar ais ag druidim le deireadh na bliana. Ní hamháin go raibh an borradh sa díoloifig dhomhanda, tar éis roinnt blianta fada, bhí Disney ar an stiúideo tosaigh sna Stáit Aontaithe arís - agus bhí an chuideachta ag éileamh fuinneog amharclainne 64 lá don chuid is mó dá cuid eisiúintí, ag cosaint an eispéiris amharclainne.

Cé nach raibh lucht freastail na bpictiúrlann ar ais ag na leibhéil roimh Covid (bhí sé ag thart ar $26 bhilliún in 2023 tar éis a bheith ag $39 mbilliún in 2019), ar fud na hEorpa, bhí torthaí díoloifige in 2024 beagán ní b’fhearr ná mar a bhíothas ag súil leis. Ba é an méid bliantúil sa RA agus in Éirinn in 2024 ná £1.06 billiún, is é sin laghdú an-bheag ar an £1.062 billiún in 2023.

Ar fud na hEorpa, bhí scannáin áitiúla áirithe ag baint amach torthaí láidre, torthaí nach raibh coinne leo den chuid is mó. San Iodáil in 2023/2024, rinne an méaldráma feimineach dubh agus bán i seit na 1940idí, C'è ancora domani, $40 milliún sa díoloifig áitiúil. In 2024, lena linn sin, dhíol clár faisnéise áitiúil Sualannach, Den sista resan, faoi mhúinteoir ar scor agus a mhac ag dul ar thuras bóthair go dtí an Fhrainc, níos mó ná 400,000 ticéad pictiúrlainne - líon níos mó ná riamh a bhí níos suntasaí fós ag cur san áireamh gur scannán é seo a tharraing spéis ó dhaonra níos sine den chuid is mó. 

Tá comharthaí ann i margadh na Ríochta Aontaithe agus na hÉireann go bhfuil scannáin neamhspleácha agus scannáin i dteangacha iasachta ag athbhunú bonn láidir i bpictiúrlanna agus ar sheirbhísí sruthaithe. Tá fianaise ann freisin go bhfuil lucht féachana díograiseoirí scannán níos óige ag teacht chun cinn, agus lucht féachana níos óige ag baint úsáid as an ardán sóisialta Letterboxd chun moltaí a fháil.

Tá an chuideachta sruthaithe sainealaíne, léiritheoir agus dáileoir neamhspleách MUBI ag leanúint ar aghaidh ag fás le hoifigí i 14 thír agus scláta lena n-áirítear roghanna féile nua agus iomaitheoirí dámhachtana (The Substance, Past Lives) chomh maith le teidil chlasaiceacha níos sine.

Deiseanna Léiriúcháin Eorpacha

San Eoraip, bhí muinín athnuaite maidir leis na hionchais do léiriú intíre neamhspleách. Le linn 2024, mhéadaigh an RA dreasachtaí cánach do léiriúcháin áitiúla ar bhuiséad íseal agus meánach - agus treisíodh bearta fioscacha don mhaisíocht físe. In Éirinn, rinneadh feabhsuithe breise ar chreidmheas cánach do scannáin mar chuid d’Alt 481.

D’aistrigh tionscal cluichíochta na hEorpa ó bheith ina mhargadh nideoige go “mórchumhacht tionscail ar fiú beagnach $187 milliún é in ioncam domhanda” in 2024. Tá Réaltacht Bhreisithe (AR) agus Réaltacht Fhíorúil (VR) ag tiomáint fás eacnamaíoch ar an gcaoi chéanna. Nuair a measadh i dtuarascáil 2019 PwC Seeing Is Believing go bhfuil “an cumas ag VR agus AR $1.5 trilliún a chur leis an ngeilleagar domhanda faoi 2030,” bhí go leor a dhearbhaigh gur sprioc áiféiseach dóchasach a bhí ann. Mar sin féin, faoi 2024, bhí luach $25 bhilliún ar an margadh XR cheana féin de réir anailísithe de chuid Augmented World Expo – agus, tar éis na hIntleachta Saorga, is í an earnáil teicneolaíochta is tapa fás í.

Idir an dá linn, tá comharthaí ann i roinnt críoch go bhfuil Treoir an AE maidir le Seirbhísí Meán Closamhairc (AVMSD) ag cur acmhainní breise isteach i léiriú scannán intíre go rathúil. Ligeann AVMSD do Bhallstáit tobhaigh airgeadais a chur ar sheirbhísí físeáin ar éileamh atá bunaithe in áiteanna eile, ach a dhíríonn ar a lucht éisteachta náisiúnta. Tá na tobhaigh roghnach ach tá cuóta éigeantach 30% ar ardáin freisin maidir le tionscadail a dhéantar san Eoraip. 

Sa Fhrainc, táthar ag iarraidh orthu siúd a bhíonn ag sruthú go domhanda, a bhfuil Disney, Netflix agus Prime Video chun tosaigh ina measc, íosmhéid 20% den láimhdeachas áitiúil a infheistiú ar ais i léiriú de chuid na Fraince mar chuid den Treoir. Léirigh tuarascáil a d’fhoilsigh Lárionad Náisiúnta Pictiúrlainne (CNC) na Fraince agus an t-údarás closamhairc ARCOM i mí na Samhna 2024 go raibh na cuideachtaí sruthaithe a bhíonn ag sruthú go hidirnáisiúnta tar éis $1.02 billiún a infheistiú i léiriú de chuid na Fraince dá bharr. 

Tá rialtais ar fud na hEorpa agus níos faide i gcéin ag leanúint ar aghaidh ag tacú le tionscnaimh chánach chun tionscadail infheistíochta isteach a mhealladh. I mí na Samhna 2024, bhí an Danmhairg ar an tír is déanaí chun dreasacht chánach scannán a sheoladh le lacáiste ar speansais a bhfuil coinne leis gur fiú 25% é. Chuir an RA feabhas ar a scéimeanna dreasachta cánach le bliain anuas freisin. Bhí scéimeanna dreasachta cánach faoi réir athbhreithniú i gcónaí. Mar sin féin, tá siad ríthábhachtach fós chun na hearnálacha scannán agus teilifíse a fhás san Eoraip agus níos faide i gcéin.

Ba phort coitianta é “Survive till 25” in 2024, a dúradh in earnálacha éagsúla den tionscal idirnáisiúnta le linn tréimhse a aithníodh go forleathan mar thréimhse chostchiorraithe agus éiginnteachta eacnamaíche. Mar sin féin, faoi dheireadh na bliana ba léir go raibh an tionscal domhanda ag teacht ar ais chuige féin, agus an chuid is mó den imní faoina thodhchaí fhadtéarmach laghdaithe.

Tá athrú suntasach tagtha ar thionscal scáileáin na hÉireann, fiú sa tréimhse réasúnta gearr ó foilsíodh Ag Tógáil Ar Son Todhchaí Chruthaitheach den chéad uair in 2021. Agus é múnlaithe ag tosca lena n-áirítear an fás léiriúcháin ba mhó riamh, cáil agus rath idirnáisiúnta, bristeacha domhanda, agus tacaíocht struchtúrtha níos láidre do léiriú scáileán in Éirinn, is tírdhreach atá ag athrú go tapa é seo.

Anois, níos mó ná riamh, tá bonn láidir atá tógtha go cúramach le haghaidh tuilleadh ratha ríthábhachtach.

In 2018, sheol an rialtas an Plean Gníomhaíochta Closamhairc, clár maoinithe €200 milliún mar chuid de phlean infheistíochta caipitil na Roinne Cultúir, Oidhreachta agus Gaeltachta dar teideal ‘Infheistiú inár gCultúr, inár dTeanga agus inár nOidhreacht 2018—2027’. Leagadh amach sa Phlean sin na tosaíochtaí caipitil straitéiseacha ardleibhéil don Roinn i gcaitheamh na ndeich mbliana atá romhainn lena n-áireofar earnáil bhríomhar Léiriúcháin Closamhairc agus Meán a fhorbairt, ag tabhairt deiseanna nua eacnamaíocha ar fud na hÉireann, trí thacaíocht mhéadaithe ón Rialtas.

Ó seoladh an Plean Gníomhaíochta Closamhairc, tá Fís Éireann tar éis gníomhú ar gach moladh a leagadh amach sa phlean, a chuimsigh réimsí chomh leathan agus: feabhsuithe córasacha ar dhreasacht chánach mar chuid d’Alt 481, faoi stiúir na Roinne Turasóireachta, Cultúir, Ealaíon, Gaeltachta, Spóirt agus Meán; méadú ar mhaoiniú forbartha agus léirithe; méadú ar léiriú scannán nua Éireannach agus drámaíocht teilifíse; ciste náisiúnta léirithe a bhunú; agus oiliúint agus breisoiliúint níos struchtúrtha, spriocdhírithe d'oibrithe scannán agus don chriú, go háirithe ar bhonn náisiúnta. Tá Fís Éireann tiomanta arís d’oibriú go dlúth le Ranna Rialtais agus le comhlachtaí stáit eile chun ullmhú do chéim nua leathnaithe agus athnuachana don earnáil chlosamhairc in Éirinn.

Tá dul chun cinn suntasach déanta i leith phríomh-mholtaí na tuarascála, amhail cur i bhfeidhm na Treorach maidir le Seirbhísí Meán Closamhairc, agus tá Fís Éireann tiomanta do leanúint ag obair i gcomhpháirtíocht le Coimisiún na Meán maidir leis an bhféidearthacht do thobhach saothair Eorpach. Iarradh sa Phlean Gníomhaíochta Closamhairc freisin go ndéanfaí Treoir an AE maidir le Cóipcheart sa Mhargadh Aonair Digiteach a thrasuí, chun tairbhe a dhéanamh do chosaint agus do shaothrú na maoine intleachtúla a dhíorthaítear trí léiriú scáileáin cruthaitheach in Éirinn. Ó trasuíodh i ndlí na hÉireann í, tá Fís Éireann tar éis tacú le plé agus rannpháirtíocht leanúnach le páirtithe leasmhara níos leithne sa tionscal, ag éascú cruinnithe neamhspleácha le hionadaithe do scríbhneoirí scáileáin, stiúrthóirí, cumadóirí, aisteoirí, léiritheoirí beochana agus beo-aicsin, agus tháinig na páirtithe go léir ar chomhdhearcadh maidir le treoirlínte eatramhacha dea-chleachtais tionscail ag deireadh 2024.

I mí Mheán Fómhair 2020, bhunaigh an Rialtas an Coimisiún um Thodhchaí na Meán chun todhchaí na meán in Éirinn a scrúdú. Tacaíonn Fís Éireann go láidir le ról na meán seirbhíse poiblí in Éirinn maidir le héagsúlacht chultúrtha agus scéalaíocht na hÉireann a chur chun cinn ar an scáileán atá inrochtana ag lucht féachana ar fud na hÉireann. 

Creidimid go bhfuil ríthábhacht do shochaí dhaonlathach ag baint le meán seirbhíse poiblí atá neamhspleách agus cothromaithe agus a bhfuil neart acmhainní aige.

Le blianta beaga anuas, d’oibrigh an tsraith beart seo a cuireadh i bhfeidhm le chéile chun an uaillmhian atá luaite go forleathan ag an Rialtas go dtiocfadh Éire chun bheith ina lárionad sármhaitheasa domhanda a neartú.

Chuir athruithe le déanaí ar Alt 481 i mBuiséid Rialtais leantacha béim ar thiomantas láidir na hÉireann dá tionscal scáileáin cruthaitheach.

In 2022, tugadh isteach Faoiseamh Cluichí Digiteacha, rud a léirigh an fhéidearthacht ollmhór atá ag geilleagar cruthaitheach digiteach na hÉireann.

In 2023, leathnaíodh Alt 481 go dtí 2028, rud a sholáthair cobhsaíocht agus leanúnachas d’Éirinn mar iomaitheoir idirnáisiúnta.

In 2024, d’fháiltigh Fís Éireann roimh ardú ar an teorainn ar chaiteachas incháilithe le haghaidh Alt 481 go €125 mhilliún.

Tabharfar isteach ardú 8% do scannáin lánfhada Éireannacha in 2025, mar aon le dreasacht chánach 20% do léiriú neamhscriptithe, ar feitheamh fhaomhadh an Choimisiúin Eorpaigh.

Tá na hathruithe carnacha sin tar éis réimse níos leithne deiseanna a chruthú do thionscal scáileáin na hÉireann agus é ag dul isteach i gcéim nua forbartha.

Leagtar amach i staidéar neamhspleách nua a choimisiúnaigh Fís Éireann an méid a chuir an earnáil chlosamhairc le geilleagar na hÉireann le déanaí.

Idir 2021 agus 2023, thacaigh an earnáil chlosamhairc le 15,899 FTE san iomlán trasna a cuid comhpháirteanna éagsúla, rud a chuireann béim ar ról an tionscail mar fhostóir suntasach i ngeilleagar na hÉireann. Ghin an earnáil thart ar €862.0 milliún i gcúiteamh saothair, rud a léirigh a rannchuidiú le pá áitiúil agus gníomhaíocht eacnamaíoch. Shroich an tOll-Bhreisluach (GVA) iomlán don tionscal closamhairc €1,061.4 milliún, rud a léiríonn an luach suntasach a ghin an earnáil trasna beo-aicsin agus beochana, léiriú digiteach, dáileadh, foilsiú, tarchuir agus taispeántais. Leagann na figiúirí seo béim ar thábhacht na hearnála closamhairc mar phríomhspreagadh fáis eacnamaíoch, ag cothú jabchruthúcháin agus ag tacú le tionscail ghaolmhara ar fud na hÉireann.

Teastaíonn beartais láidre stóinsithe chun scileanna a fhorbairt agus chun poist a chruthú ar fud na hearnála chun tuilleadh fáis a dhéanamh sa tionscal amach anseo. Léirigh rannpháirtíocht le déanaí le tionscal closamhairc na hÉireann réimsí le haghaidh feabhsúcháin agus fáis, lena n-áirítear: aghaidh a thabhairt ar ghanntanas scileanna agus tallainne; a chinntiú go bhfuil bearta cothromais, éagsúlachta agus cuimsithe láidir ar fud na hearnála; coinneáil tallainne a fheabhsú; agus gairmeacha a thógáil trí fhoghlaim leanúnach agus tionscnaimh oiliúna spriocdhírithe. Leagann straitéis forbartha scileanna náisiúnta Rialtas na hÉireann béim ar fhoghlaim ar feadh an tsaoil agus cuimsiú gníomhach. Léiríonn líonra an Acadaimh Náisiúnta Tallainne de chuid Fhís Éireann go háirithe – atá comhdhéanta anois de shé acadamh agus mhol éagsúla in Oirthear, in Iarthar agus i nDeisceart na tíre – an beartas seo maidir le rannpháirtíocht ghníomhach agus tacaíochtaí leathana a thabhairt le chéile d’iontrálaithe nua agus do ghairmithe tionscail araon.

Tá rathúlacht thionscal scáileáin na hÉireann — arna tiomáint ag éachtaí indibhidiúla agus ag fás comhchoiteann araon — tar éis an tionscal a chur ar airde nua, ach tá dúshláin fós ann, go háirithe i bhfianaise dhúshláin reatha an tionscail scáileáin dhomhanda. Chruthaigh an forleathnú seo tírdhreach saibhir le deiseanna, agus tá go leor le fáil fós de réir mar a leanann an tionscal ag fás. Is réimse é a bhfuil acmhainneacht fhairsing ag baint leis – inar féidir le smaointe nua, sreafaí oibre agus formáidí scéalaíochta ról lárnach a bheith acu maidir le todhchaí an léiriúcháin scáileáin a athshainiú.

Is é atá i gcroílár mhisean Fhís Éireann ná léiriú an chultúir náisiúnta ar an scáileán.

Is sainchúram leathan é seo: ceadaítear leis réimse leathan de scéalta atá in ann Éire a chur in iúl – a luachanna, a hábhair imní, a saol laethúil agus a stair – ina héagsúlacht agus ina fairsinge ar fad. Agus é mar aidhm aige tionscadail a shainaithint a nascfaidh go domhain le lucht féachana, creideann Fís Éireann gur cheart tacú le scéalta atá leagtha amach le diongbháilteacht, barántúlacht agus paisean – agus a dhéantar le luachanna arda léiriúcháin a léiríonn obair, fís agus scil chomhroinnte na foirne cruthaithí agus ealaíonta. 

Feiceann Fís Éireann a ról mar abhcóide agus mar churadh don lucht déanta scéalta seo.

Trí mhaoiniú agus tacaíocht straitéiseach, is é an aidhm atá againn ná ceannas a ghlacadh ar fhorbairt bonneagair chultúrtha a thugann spás agus saoirse d’ealaíontóirí chun rioscaí cruthaitheacha a ghlacadh agus chun tiomantas dáiríre a thabhairt dá scéal ag na leibhéil cheardaíochta agus uaillmhéine is airde is féidir.

Tá gach seánra chomh tábhachtach céanna don fhís atá ag Fís Éireann don todhchaí.

Tá scannáin lánfhada a dhéantar don scáileán mór agus atá beartaithe le breathnú orthu mar eispéireas comhroinnte don lucht féachana lárnach dár bhfís, agus ríthábhachtach chun clú na hÉireann ar stáitse an domhain, atá iontach cheana féin, a mhéadú.

Is fórsa domhanda í beochan na hÉireann a spreag rathúlacht ardphróifíle léiriúcháin, ealaíonta agus tráchtála, agus is é aidhm Fhís Éireann breis nuálaíochta agus fiosrú teicneolaíochtaí nua a spreagadh chun a bheith ina cheannaire earnála domhanda.

Tá earnáil láidir agus dhinimiciúil clár faisnéise in Éirinn, rud a fhágann go mbíonn tionchar ag cláir faisnéise atá chomh mór céanna leis an siamsa a bhaineann leo.

Is é an fhís atá ag Fís Éireann ná leanúint le tacaíocht a thabhairt do thionscadail ar féidir leo saincheisteanna náisiúnta a fhiosrú, comhrá agus díospóireacht níos leithne a spreagadh, a dhéantar le huaillmhian agus fís scannánaíochta.

Mar thoradh ar thacaíocht Fhís Éireann do dhrámaí teilifíse den scoth le blianta beaga anuas, tá méadú láidir ar an aschur náisiúnta, agus tugann sé sin deis iontach chun léiriú drámaíochta a thabhairt isteach i gcéim nua uaillmhéine agus fiontraíochta.

Earnáil atá ag méadú go tapa is ea maisíocht físe agus iarléiriú go háirithe, atá riachtanach do gach seánra de léiriú scáileáin, agus tá Fís Éireann tiomanta dá rathúlacht úrnua a chur chun cinn mar dheis láidir d’fhás an tionscail.

D’fhonn scála agus uaillmhian na scéalaíochta Gaeilge a mhéadú agus a chinntiú go leanfar leis an bhfás, déanfaidh Fís Éireann maoiniú a imfhálú ar fud gach seánra do thionscadail Ghaeilge.

Príomhghníomhaíochtaí

1. Neartú agus infheistíocht a dhéanamh i gcultúr scannánaíochta náisiúnta agus scannán na hÉireann trí thacú le príomhthionscadail scannán uaillmhianacha chruthaitheacha.

2. Tacú le próiseas forbartha cruthaitheach chun an tionscal a chumasú chun tionscadail a fhorbairt go hiomlán roimh léiriú.

3. Deiseanna cruthaitheacha le haghaidh scéalaíochta comhoibríche a leathnú trí chomhléiriú Eorpach agus comhpháirtíochtaí idirnáisiúnta.

4. Teilifís Éireannach ardleibhéil shainiúil agus uaillmhianach a chothú do lucht féachana domhanda.

5. Tacú le hamharcealaíona leanúnacha earnáil beochana na hÉireann, ag spreagadh nuálaíochta agus scála domhanda.

6. Leanúint ar aghaidh ag tacú le scannáin lánfhada agus sraitheanna faisnéise cruthaitheacha a léiríonn uaillmhian agus fís scannánaíochta.

7. Comhpháirtíocht a dhéanamh leis an earnáil iarléiriúcháin agus maisíochta físe chun deiseanna gnó nua a shainaithint agus chun a cumas fáis thapa a bhrú chun cinn.

8. Leas a bhaint as an deis dhomhanda d’earnáil na gcluichí digiteacha in Éirinn trí thacaíochtaí agus comhpháirtíochtaí tiomnaithe.

9. Tacú le nuálaíocht scéalaíochta trí fhormáidí nua agus teicneolaíochtaí cruthaitheacha.

10. Maoiniú don Ghaeilge a imfhálú thar gach réimse scéalaíochta chun scála agus uaillmhian a mhéadú.

Creideann Fís Éireann go bhfuil forbairt tallainne ag croílár tionscail scáileáin faoi bhláth.

Tá infheistíocht i bhforbairt tallainne riachtanach chun gairmeacha inbhuanaithe a fhorbairt ag gach céim den turas – rud a ligeann d’ealaíontóirí atá ag teacht chun cinn a nguth a fhorbairt, agus ag an am céanna a chinntiú go leanann scannánóirí a bhfuil taithí acu ag forbairt ar stáitse domhanda. 

Cuimsíonn déantóirí scéalta agus ealaíontóirí an réimse tallainne cruthaithí atá ag obair inár dtionscal – ó léiritheoirí cruthaitheacha go scríbhneoirí scáileáin go criú léirithe.

Tá sé mar aidhm ag Fís Éireann oibriú le chéile le tionscal scáileáin na hÉireann chun tacú le healaíontóirí agus le daoine cruthaitheacha agus iad ag tabhairt faoin gcéad chéim eile chun gairm bheatha fhadtéarmach a thógáil.

Tá tiomantas láidir d’fhorbairt deiseanna ar fud na tíre mar bhonn agus thaca aige sin, chomh maith le héagsúlacht, cothromas agus cuimsiú, ag cinntiú go ndéanann tionscal scáileáin na hÉireann ionadaíocht ar Éirinn chomhaimseartha ar an mbealach is iomláine agus is féidir, os comhair an cheamara agus taobh thiar de araon.

Cuimseoidh cur chuige straitéiseach Fhís Éireann i leith forbairt tallainne raon leathan tacaíochtaí: ó scéimeanna maoinithe dírí go meantóireacht chruthaitheach go dtí cinntiú go bhfuil píblíne láidir agus chobhsaí léiriúcháin i bhfeidhm don tionscal.

Tá cáil thallann na hÉireann, idir a lucht cruthaitheach agus a criú, ag éirí níos lárnaí do thairiscint na hÉireann mar mhol domhanda léiriúcháin.

Ag tógáil ar an gcáil sin agus ag cur i dtábhacht a láidreacht chomhchoiteann, leagtar béim ar an luach a thugann sí – ní hamháin do stiúideonna idirnáisiúnta a bhunaíonn léiriúcháin in Éirinn, ach do lucht déanta scéalta Éireannacha a chuireann a gcuid tionscadal ar fáil ar mhargaí idirnáisiúnta.

Príomhghníomhaíochtaí

1. Infheistíocht a dhéanamh i réimse leathan de scéimeanna léiriúcháin gearrscannán chun guthanna éagsúla agus scannánóirí atá ag teacht chun cinn a aimsiú agus a chothú.

2. Réimse tacaíochtaí a sholáthar chun infheistíocht a dhéanamh i bhforbairt tallainne agus deiseanna fáis gairme do léiritheoirí.

3. Réimse guthanna cruthaitheacha a fhorbairt trí thionscnaimh maoinithe dhírigh do thallann chruthaitheach.

4. Tús áite a thabhairt do dheiseanna forbartha tallainne spriocdhírithe do chriú agus do lucht saothair trí phíblíne léiriúcháin.

5. Tacú le cur chun cinn agus aitheantas thallann chruthaitheach na hÉireann, go náisiúnta agus go hidirnáisiúnta.

Mhol Fís Éireann i gcónaí cur chuige déach i leith forbairt tionscail, cur chuige a chothaíonn cothromaíocht idir tionscadail Éireannacha agus idirnáisiúnta agus a chruthaíonn réimse deiseanna do chruthaitheoirí Éireannacha oibriú i gcomhpháirtíocht le stiúideonna Éireannacha nó idirnáisiúnta.

Mar thoradh ar rath an chur chuige sin tá timpeallacht níos láidre agus níos inbhuanaithe ann do léiriú scannán.

De réir mar a leanann ár dtionscal ag fás, tá cothromaíocht agus comhpháirtíocht fós ina dtosaíochtaí, in éineacht le fócas feabhsaithe ar léiriú inbhuanaithe.

Tá Fís Éireann tiomanta do chur chuige comhcheangailte a chur chun cinn maidir le forbairt tionscail sa todhchaí, ag obair le gach páirtí leasmhara agus comhpháirtí tionscail chun uaillmhian an Rialtais a bhaint amach le chéile chun Éire a bhunú mar mhol domhanda léirithe.

Mar ghníomhaireacht, táimid fós an-tiomanta don chleachtas is fearr agus do phrionsabail na hinbhuanaitheachta i ngach gné d'fhorbairt an tionscail, cibé an fás eacnamaíoch freagrach é sin; cosaint an chomhshaoil; léiriú glas; dínit san ionad oibre; nó forbairt náisiúnta.

Tá sé mar aidhm ag Fís Éireann ceannaireacht láidir a sholáthar ar fud cleachtais léirithe níos glaise, ag leanúint lena réamhobair sa réimse seo, lena n-áirítear caighdeáin ar fud an tionscail, a coimisiúnaíodh agus a foilsíodh in 2022 agus cistí agus cláir inbhuanaitheachta réamhbhreathnaitheacha, amhail Ciste an Chomhairleora Inbhuanaitheachta agus Ciste Nuálaíochta Inbhuanaitheachta na gníomhaireachta.

Tá forbairt bonneagair stiúideo agus bonn láidir criúnna ríthábhachtach dó sin, le tacaíocht ó chuideachtaí léiriúcháin agus léiritheoirí láidre.

Tá sé mar aidhm ag Fís Éireann cuideachtaí léiriúcháin ar fud na tíre a chumhachtú chun na scileanna, an t-eolas, an cumas agus na hinniúlachtaí gnó cearta a fhorbairt chun dul san iomaíocht go domhanda, agus cleachtais láidre rialachais agus airgeadais a ionchorprú ina n-eagraíochtaí.

Tá an tábhacht a bhaineann le maoin intleachtúil a ghiniúint agus a choinneáil ríthábhachtach do tháirgeoirí agus d’ealaíontóirí na hÉireann, agus táimid tiomanta dá chinntiú go gcaitear go cothrom léi ar fud na dtionscadal atá maoinithe ag Fís Éireann.

De réir mar a thagann formáidí agus teicneolaíochtaí nua chun cinn, féadann bealaí agus foirmeacha nua scéalaíochta cruthaithí deiseanna a thabhairt d’ealaíontóirí chun disciplíní a thrasnú agus foirmeacha nua cruthaitheachta a fhiosrú.

Oibreoidh Fís Éireann go dlúth leis an tionscal maidir le coimirciú agus cosaint don todhchaí i ndáil le teicneolaíochtaí nua agus teicneolaíochtaí atá ag teacht chun cinn, ag cur béim ar an tábhacht a bhaineann le taighde, oideachas agus oiliúint sna réimsí sin a mhéid a bhaineann le sreafaí oibre léiriúcháin nua agus dea-chleachtas idirnáisiúnta.

Chun leibhéil uaillmhianacha chlaochlúcháin agus fáis a bhaint amach don tionscal, beidh gá le cur chuige náisiúnta, a chomhordóidh sraith leathan de thacaíochtaí agus deiseanna forbartha tallainne ar fud na tíre.

Tá daoine i gcroílár rathúlacht na hearnála closamhairc. Díríonn Fís Éireann ar chur chuige daonna-lárnach i leith forbairt scileanna; ceann a chuidíonn agus a thacaíonn le daoine a n-acmhainneacht a bhaint amach, a scileanna cruthaitheacha, teicniúla, pearsanta, fiontraíochta a fhorbairt, agus ar deireadh thiar, rath a bhaint amach ina róil, ina dtionscadail agus ina ngairmeacha beatha. Tá daoine i gcroílár rathúlacht na hearnála closamhairc. Díríonn Fís Éireann ar chur chuige daonna-lárnach i leith forbairt scileanna; ceann a chuidíonn agus a thacaíonn le daoine a n-acmhainneacht a bhaint amach, a scileanna cruthaitheacha, teicniúla, pearsanta, fiontraíochta a fhorbairt, agus ar deireadh thiar, rath a bhaint amach ina róil, ina dtionscadail agus ina ngairmeacha beatha.

Mar earnáil, táimid tiomanta do phobal éagsúil agus fáilteach a fhorbairt ina bhfuil daoine cumasacha – le tacaíocht ó ionaid oibre shábháilte, chuimsitheacha a spreagann paisean agus a chothaíonn saothar den scoth mar thoradh air sin.

Éilíonn fás tapa thionscal an scáileáin in Éirinn, chomh maith le dúshláin agus deiseanna nua don earnáil ar fad, cur chuige níos córasaí chun rath fadtéarmach tráchtála agus cruthaitheach a bhaint amach.

Mar thoradh air sin, is é aidhm Fhís Éireann ná an tionscal iomlán a chumasú chun oibriú le chéile, riachtanais scileanna agus bearnaí a shainaithint go rialta ar fud na hearnála de réir mar a thagann siad chun cinn, agus tionscnaimh nua a chur i bhfeidhm ar bhealach inbhuanaithe, comhtháite.

Trí thacú le forbairt scileanna trí chomhpháirtíocht straitéiseach agus trí chomhoibriú, tá sé mar aidhm againn éiceachóras níos láidre a thógáil, le tacaíocht ó eagraíochtaí páirtithe leasmhara, líonra an Acadaimh Náisiúnta Tallainne de chuid Fhís Éireann agus cuideachtaí léiriúcháin Éireannacha ar fud na tíre.

Le straitéis scileanna ailínithe, tá deis láidir ann ceannaireacht a sholáthar agus cumas ár n-earnála le haghaidh nuálaíochta agus riosca a mhéadú - ag tógáil ar an dul chun cinn atá ann cheana féin agus ag leathnú ár n-uaillmhéine maidir le soláthar scileanna ag leibhéal den chéad scoth.

Príomhghníomhaíochtaí

1. Aghaidh a thabhairt ar réimsí scileanna tosaíochta agus riachtanais atá ag teacht chun cinn, trí chláir fheabhsaithe scileanna agus forbartha gairmiúla mar chuid d’Alt 481.

2. Oibriú le líonra an Acadaimh Náisiúnta Tallainne, le páirtithe leasmhara tionscail, le cuallachtaí agus le príomhghrúpaí pobail chun tallann reatha agus tallann na céad glúine eile a fhorbairt.

3. Cumhacht a thabhairt do phríomhpháirtithe leasmhara cumas earnála a thógáil chun tionscnaimh forbartha príomhscileanna a sheachadadh ar fud na tíre, le príomhfhócas ar thacú le forbairt scileanna, dul chun cinn gairme agus coinneáil lucht saothair.

4. Oibriú i gcomhpháirtíocht le príomhpháirtithe leasmhara chun earnáil lánchuimsitheach agus inbhuanaithe a fhorbairt ar bhealach níos córasaí, le dínit san ionad oibre, éagsúlacht, cothromas agus cuimsiú mar chroílár aici.

5. Cineálacha cur chuige nuálacha den scoth i leith na foghlama agus na forbartha a chur chun cinn, i gcomhar le príomhpháirtithe leasmhara.

Tá an cumhacht a bhaineann le scannáin, teilifís, beochan, scannáin faisnéise agus gearrscannáin na hÉireann suite ar a naisc leis an lucht féachana.

Tá an iliomad nasc cultúrtha, tráchtála agus ealaíne le déanamh: a chruthaítear ag féilte scannán, i bpictiúrlanna, ar ardáin sruthaithe agus ar theilifís líneach – agus freisin i suíomhanna pobail comhroinnte ar nós ionaid ealaíon, scoileanna agus ag pictiúrlanna imeachtaí.

Sna cúig bliana amach romhainn, tá sé mar aidhm ag Fís Éireann tacaíochtaí reatha agus tacaíochtaí sa todhchaí a chomhdhlúthú agus a shruthlíniú le haghaidh rannpháirtíocht agus forbairt lucht féachana, ag díriú a airde ar bhonneagar cultúrtha níos leithne a neartú a ligfidh do lucht féachana in Éirinn agus ar fud an domhain spéis a chur i scannáin agus teilifís na hÉireann agus dul ina mbun ar an mbealach is éasca agus is minice agus is féidir.

Cruthaítear an bonneagar cultúrtha níos leithne seo le tacaíochtaí straitéiseacha d’fhéilte scannán na hÉireann ar fud na tíre; féilte idirnáisiúnta scannán Éireannach i gcríocha agus i gcathracha tábhachtacha a bhfuil diaspóra láidir Éireannach iontu; agus fearas poiblíochta níos leithne a úsáideann sócmhainní margaíochta spriocdhírithe agus caidrimh láidre le príomhdháileoirí, gníomhairí díolacháin agus comhpháirtithe cultúrtha.

Tacaíonn uirlisí fionnachtana leis freisin amhail Where to Watch Ireland agus comhpháirtíochtaí eile ar líne a bheidh mar aidhm acu ábhar Éireannach a dhéanamh chomh héasca agus is féidir le haimsiú.

Tá infheistíocht i gcur chun cinn scannánaíocht agus dhrámaíocht teilifíse na hÉireann mar fhórsa cultúrtha comhchoiteann ríthábhachtach chun cur le cáil dhomhanda an tionscail atá ag éirí níos dearfaí.

Trí bhéim ar rath comhchoiteann cumasaítear scéalta scáileáin aonair na hÉireann iad féin a chur i gcomhthéacs tairisceana cultúrtha domhanda – ‘tonn glas’ rathúlachta.

Príomhghníomhaíochtaí

1. Tacaíochtaí reatha agus tacaíochtaí sa todhchaí a chomhdhlúthú le haghaidh dáileadh scannán agus féilte scannán na hÉireann chun bonneagar láidir áitiúil a chruthú le haghaidh forbairt lucht féachana.

2. Ábhar scáileáin cruthaitheach Éireannach a chur chun cinn chuig féilte, gníomhairí díolacháin agus dáileoirí idirnáisiúnta.

3. Fócas straitéiseach a leagan ar rannpháirtíocht lucht féachana ag an gcéim forbartha déanaí agus iarléiriúcháin.

4. Infheistíocht a dhéanamh i sócmhainní láidre meán do scannánaíocht, teilifís agus beochan na hÉireann agus feachtais áitiúla agus idirnáisiúnta a chruthú chun feasacht an lucht féachana ar scéalta scáileáin na hÉireann a mhéadú.

5. Lucht féachana don chéad ghlúin eile a thógáil i gcomhpháirtíocht leis an tionscal, trí fheachtais for-rochtana, mhargaíochta agus chumarsáide agus príomhimeachtaí.

Leanfaidh Fís Éireann ar aghaidh ag moladh agus ag tacú leis an earnáil scáileáin chruthaitheach in Éirinn.

Tá freagracht agus cumarsáid chomhroinnte le tionscal scáileáin níos leithne na hÉireann ríthábhachtach don fhís seo – ag cinntiú go bhfuil an chumhacht ag an earnáil saincheisteanna a shainaithint agus freagairt dóibh i dteannta a chéile agus go comhtháite.

Oibreoimid chun rannpháirtíocht agus comhpháirtíocht a mhéadú, ag tabhairt tosaíocht do chur chuige chun an earnáil a fhorbairt atá comhordaithe agus comhoibríoch seachas ilroinnte.

Oibreoimid chun na hacmhainní atá ar fáil a thabhairt le chéile chun réitigh chruthaitheacha a neartú agus a fhorbairt, chun bonneagar tacúil a thógáil agus chun tionscal scáileáin cuimsitheach agus faoi bhláth a chur chun cinn.

Chun é sin a dhéanamh, leanfaidh Fís Éireann de bheith ina ghníomhaireacht atá éifeachtach, éifeachtúil agus freagrúil, an eagraíocht á scálú go cuí chun uaillmhianta an tionscail don todhchaí a chomhlíonadh.

Tá Fís Éireann tiomanta do phrionsabail an dea-rialachais, mar atá leagtha amach sa Chód Cleachtais um Rialachas Comhlachtaí Stáit. Mar ghníomhaireacht, déanaimid ár ndícheall chun an caighdeán is airde de struchtúir rialachais chorparáidigh a chur i bhfeidhm chun a chinntiú go bhfeidhmíonn Fís Éireann go stuama agus go heiticiúil, chomh maith le trédhearcacht agus cuntasacht, as gach gníomh a dhéantar.

Comhlíonfaimid gach ceanglas reachtach, reachtúil agus dea-chleachtais maidir le tuairisciú rialachais, airgeadais agus feidhmíochta.

Ó thús go deireadh, díreoimid ar inbhuanaitheacht chomhshaoil agus ar fhás inbhuanaithe, agus é mar aidhm againn ceannaireacht a thabhairt le dea-shampla maidir le gníomhú ar son na haeráide.

Tá Fís Éireann tiomanta do spriocanna an tSainordaithe maidir le Gníomhú ar son na hAeráide don Earnáil Phoiblí a bhaint amach, agus torthaí láidre ann go dtí seo.

Cheana féin, tá laghdú 31% ar astaíochtaí foriomlána GCT bainte amach ag an ngníomhaireacht, agus is é an sprioc atá fágtha aici laghdú 51% ar astaíochtaí a bhaineann le fuinneamh a bhaint amach faoi 2030. Tá an sprioc éifeachtúlachta fuinnimh 50% bainte amach aici cheana féin.

Príomhghníomhaíochtaí

1. Ceannaireacht a sholáthar i gcleachtais Chomhshaoil, Shóisialta agus Rialachais (ESG), ag seachadadh ghealltanais reachtacha, reachtúla agus rialachais Fhís Éireann lena n-áirítear inbhuanaitheacht, trí thionscnaimh nua agus fhorásacha.

2. Próisis inmheánacha Fhís Éireann a shruthlíniú chun laghdú ar an aga slánúcháin d’iarratais a chinntiú.

3. Feabhas a chur ar rannpháirtíocht an tionscail le Fís Éireann trí chumarsáid agus aiseolas méadaithe le páirtithe leasmhara.

4. Leanúint ar aghaidh ag cothú cultúr eagraíochtúil dearfach ag Fís Éireann, ag cothú agus ag spreagadh folláine na foirne, an fhoghlaim ghairmiúil, ag cur nuálaíocht agus smaointe cruthaitheacha chun cinn go gníomhach laistigh den eagraíocht.

5. Straitéis dhigiteach nua a chur i bhfeidhm d’Fhís Éireann, ag ionchorprú sreafaí oibre lúfara agus próisis nua chun éifeachtúlacht a mhéadú.

Tá na sé chuspóir atá leagtha amach i bPlean Straitéiseach 2025 - 2029 Fhís Éireann beartaithe mar bhloic thógála don todhchaí: piléir a fheidhmeoidh mar threoir don chéim nua seo atáimid a thosú mar earnáil. Déanfaidh an Bord maoirsiú ar an bplean straitéiseach seo agus cuirfidh Feidhmeannas, bainistíocht agus foireann Fhís Éireann i bhfeidhm é. Foilseofar tuarascálacha ar dhul chun cinn chun cumarsáid shoiléir agus cuntasacht a chinntiú do na páirtithe leasmhara go léir.

Mar atá leagtha amach sa phlean straitéiseach seo, tá tiomantas Fhís Éireann chun tacú le tionscal scáileáin na hÉireann, é a chothú agus a fhás sna blianta atá le teacht, ina léiriú ar na daoine a chuireann i gcrích é – daoine cruthaitheacha agus criúnna, ar fud scannán, teilifíse, beochana agus cláir faisnéise. Táimid inár gcomhpháirtithe agus inár n-abhcóidí do lucht déanta scéalta na hÉireann i gcónaí.