News

CIARRAA ROGHNAITHE MAR PHRAOMHLÁTHAIR DO DHRÁMA MÓR TEILIFASE

Thug an tAire Ealaíon, Spóirt agus Turasóireachta, John O’Donoghue, cuairt inniu ar an seit don dráma THE RUNNING MATE, sraith teilifíse 4 X 52’ i nGaeilge a bhfuiltear á taifeadadh anois ar láthair sa Daingean, Co. Chiarraí.

Tá an tsraith bunaithe ar smaoineamh de chuid Connor McPherson, tá sí faoi stiúir Declan Recks (Pure Mule) agus scríofa ag Marcus Fleming, Nicky Murphy agus Mark Canton. Scéal faoi chleasaíocht pholaitiúil agus faoi uisce faoi thalamh atá ar bun ag polaiteoir atá ar a mhine ghéire ag iarraidh suíochán a bhaint amach i dtoghcheantar Chiarraí Thuaidh atá sa dráma THE RUNNING MATE. Nuair a bhíonn ag cliseadh ar a fheachtas, téann sé i muinín méit leis nach bhfuil mórán den ádh air agus bunaíonn siad an feachtas polaitíochta ab aistí dar bhuail Carraigín riamh. Tá Don Wycherley (Bachelors Walk), Frank Kelly (Father Ted), Dennis Conway (The Tiger’s Tail), Eamon Hunt, Carrie Crowley, Linda Breathnach agus Lesley Conroy i measc na réaltaí móra Scannán atá sa tsraith.

Tosaíodh ag déanamh an scannáin THE RUNNING MATE i gCiarraí go luath i mí Deireadh Fómhair agus beifear i mbun Scannánaíochta ar feadh seacht seachtaine ar láithreacha sa Daingean, i dTrá Lí, i mBaile an Fheirtéaraigh, in Ard na Caithne agus i gColáiste Ade, an t-aon scoil chónaithe Gaeilge sa tír.

Beidh geall le 250 oíche in óstáin áitiúla agus geall le 30 teach i gCiarraí ar cíos ag an gcuideachta léirithe ar feadh trí mhí agus iad i mbun oibre ar an tsraith. Tá breis is 750 duine breise as an áit fostaithe ag an gcuideachta léirithe agus tá idir 15 agus 20 duine de chriú lánaimseartha acu. Tá an fhoireann ag obair go dlúth chomh maith le Coláiste Réigiúnach Teicniúil Thrá Lí agus tá an coláiste tar éis roinnt dá threalamh a chur ar fáil agus mar mhalairt air sin beidh sé de chead ag mic léinn áitiúla a bheith ag obair ar an seit ar thaithí oibre ar feadh roinnt áirithe laethanta.

“Tá mo Roinn tar éis ardú 21% a dhéanamh ar bhuiséad Bhord Scannán na hÉireann agus tá sí tar éis feabhsuithe suntasacha a thabhairt isteach faoi Alt 481 maidir leis an dreasacht chánach do scannáin. D’ardaigh an ráta fostaíochta, tharla athbheochan i ngníomhaíochtaí léirithe agus bhí toradh maith ar infheistíocht an Rialtais san earnáil seo sa bhliain 2006 mar gheall air seo. Is mór an sásamh dom go bhfuil fostaíocht agus caiteachas áitiúil mar bhuntáiste ag pobail áitiúla ar na léirithe Scannánaíochta agus teilifíse a bhíonn ar siúl i bpríomhláithreacha,” arsa an tAire O’Donoghue.

“Bhí THE RUNNING MATE ábalta tairbhe a bhaint as Ciste Réigiúnach Bhord Scannán na hÉireann agus tháinig fostaíocht agus caiteachas do réigiún Chiarraí dá thoradh. Baineann tionscal na turasóireachta, tionscal atá fíorthábhachtach do Chiarraí, tairbhe as tionscadail Scannán agus teilifíse na hÉireann chomh maith. Léiríonn figiúirí Fáilte Ireland go meastar gur chaith turasóirí ón gcoigríoch a bhí meallta go hÉirinn ag tionscadail Scannánaíochta agus teilifíse, €450 milliún sa bhliain 2005,” a dúirt Naoise Barry Coimisinéir Scannán le Bord Scannán na hÉireann.

“Cuireann sé an-ríméad orainn tús a chur leis an obair léirithe ar an tionscadal spleodrach nuálach seo do TG4. Ba mhór againn an tacaíocht a thug agus an dea-mhéin a ghuigh muintir an Daingin agus muintir Chiarraí orainn agus ba mhór an spreacadh a tugadh don obair léirithe dá thoradh sin. Chuir an tacaíocht agus an dea-mhéin sin mar aon leis an tacaíocht atá tugtha ag TG4, Bord Scannán na hÉireann agus Coimisiún Craolacháin na hÉireann dúinn ar ár gcumas foireann agus criú iontach a chur le chéile agus táimid ag tnúth go mór le craoladh na sraithe sa bhliain 2007” arsa Rebecca O’Flanagan, Léiritheoir le Rubicon Films.

Is iad Rebecca O'Flanagan atá i mbun léirithe ar THE RUNNING MATE agus is iad Padd McDonald ahus Rob Walpole atá i mbun léiriú feidhmiúcháin ar an tsraith a fuair maoiniú ó Bhord Scannán na hÉireann, TG4 agus Coimisiún Craolacháin na hÉireann agus faoi Alt 481 maidir leis an dreasacht chánach a leasaíodh le déanaí. Tá maoiniú faighte ag an dráma chomh maith ón gCiste Réigiúnach do Scannáin agus don Teilifís a bhunaigh Bord Scannán na hÉireann chun déantúsóirí Scannán Éireannacha a spreagadh chun úsáid a bhaint as láithreacha Éireannacha agus a n-abhantracha atá taobh amuigh den phríomhchathair. Is é THE RUNNING MATE an dara tionscadal Scannánaíochta as Éirinn a rinneadh i gCiarraí sa chúpla mí seo caite. Rinneadh an dráma teilifíse Gaeilge An Gaeilgeoir Nocht, dráma uair an chloig, faoi stiúir Neasa Hardiman i gCiarraí i mí Deireadh Fómhair agus taispeánfar é ag Féile Scannán Chiarraí a bheidh ag tosú ar an 23 Deireadh Fómhair. Craolfar THE RUNNING MATE ar TG4 sa bhliain 2007.”